မြတ်ဗုဒ္ဓ၏ ထူးခြားသော လက္ခဏာတော် (၂၆၊ ၂၇)

များသေားအားဖြင့် လူတွေမှာ သွား သုံးဆယ်နှစ်ချောင်းသာ ပေါက်လေ့ ပေါက်ထရှိပါတယ်။ မြတ်စွာဘုရားမှာတော့ အပေါ်သွား နှစ်ဆယ်၊ အောက်သွား နှစ်ဆယ် စုစုပေါင်း သွားတော် လေးဆယ်တိတိရှိပါတယ်။

နောက်တစ်ခုက မြတ်စွာဘုရားရဲ့ အဲဒီသွားတော်လေးဆယ် တည်နေပုံဟာ ကျိုးတိုးကျဲတဲ ဖြစ်မနေပဲ ၊ စီစီညီညီနဲ့ စိန်သွားလေးများ စီထားသလို အင်မတန်ကြည့်လို့ကောင်းလှပါတယ်။

ခောတ်မီ ဖွင့်ဖြိုးတိုးတက်တဲ့ နိုင်ငံတွေမှာ မိမိသားလေး ၊ သမီးလေးများ သွားတွေ ပေါက်နေတာ မညီညာရင်၊ သွားခေါနေရင် သံကြိုးများဖြင့် ငွေကြေအကုန်အကျခံကာ ညီညာအောင်လုပ်ပေးနေတာ တွေ့ရ ပါတယ်။

မြတ်စွာဘုရားမှာ ဒီလိုသွားတော်ရဲ့ ကောင်းခြင်းဆိုတဲ့ လက္ခဏာ နှစ်ပါးနဲ့ ပြည့်စုံလို့ မကွဲမပြာ တစ်သားတည်း စည်းစည်းလုံးလုံး ညီညီညွတ်ညွတ် သမဂ္ဂဖြစ်နေတဲ့ ခြွေအရံ တပည့်ပရိတ်သတ် တွေနဲ့ ခြံရံနေခြင်းဖြစ်ပါတယ်။

မြတ်ဗုဒ္ဓသည် ပါရမီဖြည့်စဉ်ကာလက - ချစ်သူအချင်းချင်း မုန်းသွားအောင် ကွဲပြားသွားအောင် ၊ မုန်းသွားကွဲသွားပြီးနောက် မိမိကို ချစ်ခင်လာအောင် ကုန်းတိုက်၊ ရန်တိုက်ခြင်းဆိုတဲ့ ပိသုဏဝါစာ အလုပ်မျိုး မလုပ်ခဲ့ပါဘူး။ သူတစ်ပါးတွေ ချစ်ကြသူတွေ ညီညီညွတ်ညွတ် မျှမျှတတ ချစ်ချစ်ခင်ခင် ဖြစ်နေကြတာကို မြင်ရရင် ဝမ်းမြောက်ဝမ်းသာ နှစ်သက်ကျေနပ်ခဲ့ပါတယ်။ ချစ်ခင် စည်းလုံး နေသူများကို ကွဲမသွားစေတဲ့အပြင် စည်းလုံးညီညွတ်ခြင်းရဲ့ အကျိုးကိုသာ ဟောပြော အားပေး လေ့ရှိခဲ့ပါတယ်။

ဒါကြောင့် ကုန်းတိုက်သူများမှာ ဖြစ်လေ့ရှိတဲ့ သွားချောင်းမျာ မပြည့်မစုံ သုံးဆယ့်နှစ်ချောင်းသာ ပေါက်ခြင်းနဲ့ သွားတွေ မညီမညာ ကျိုးတိုးကျဲတဲ ဖြစ်နေခြင်းမျိုး မရှိပဲ၊ မြတ်စွာဘုရားမှာ သွားတော် လေးဆယ်တိတိရှိခြင်း၊ သွားတော်တိုင်းဟာလဲ ညီညီရီရီ စိန်စီထားသလို ဖြစ်ခြင်းဆိုတဲ့ အကျိုး လက္ခဏာတွေ ထင်ခြားနေပြီး ၊ စည်းလုံးညီညွတ်တဲ့ တပည့်ပရိတ်များရှိနေခြင်းဖြစ်ပါတယ်။

ဖြစ်လေရာဘဝတိုင်းမှာ လှပစီရီ ညီညာသော သွားအလှပိုင်ရှင်ဖြစ်ဖို့၊ မိမိရဲ့ တပည့် သား၊ သမီးများလည်း ပျော်ပျော်ရွှင်ရွှင် ညီညီညွတ်ညွတ်ဖြစ်ဖို့ ၊ မိမိချစ်သူများနဲ့လည်း ကွဲမသွားစေဖို့ ကုန်းတိုက်၊ ရန်တိုက်စကားများ ရှောင်ရှားကြပါလေ။