မြတ်ဗုဒ္ဓ၏ ထူးခြားသောလက္ခာတော် (၇)

များသောအားဖြင့် လူအများရဲ့ ခြေချောင်းလက်ချောင်းများဟာ ကြမ်းကြမ်းတမ်းတမ်း ရှိတတ်ကြပြီး လက်ငါးချောင်း၊ ခြေငါးချောင်းဟာ တိုရှည် မညီမညာနဲ့ ကြည့်လို့ မလှပါဘူး။

မြတ်ဗုဒ္ဓရဲ့ လက်ချောင်းခြေချောင်းများကတော့ နုညံ့ပျော့ပြောင်းလှပပြီး၊ ခြေမလက်မမှတပါး အခြားခြေချောင်း၊ လက်ချောင်းများဟာ အကြီးအငယ်အလိုက် ပြေပြေသွယ်သွယ်ရှိပြီး ၊ တိုရှည်မရှိ တိကျညီညာ ဖြစ်နေပါတယ်။
ဤလက္ခဏာနှင့် ပြည့်စုံခြင်းကြောင့် မြတ်ဗုဒ္ဓမှာ ညီညီညွတ်ညွတ် လိုက်နေကြတဲ့ လက်ယာတော်ရံ အရှင်သာရိပုတ္တရာ၊ လက်ဝဲတော်ရံ အရှင်မဟာမောဂ္ဂလာန် စသော ရဟန်းပရိတ်သတ်၊ လူပရိတ်သတ် ၊ မင်းပရိတ်သတ် အခြံအရံတွေနဲ့ ပြည့်စုံနေပါတယ်။

ဤလက္ခဏာတော်နှင့် ပြည့်စုံရခြင်းမှာ…..မြတ်ဗုဒ္ဓသည် ပါရမိဖြည့်စဉ်ကာလက လူအများကို သင်္ဂဟလေးပါးနဲ့ ချီးမြှောက်လေ့ရှိပါတယ်။ ချီးမြှောက်၊ ပေးကမ်း၊ လှူဒါန်း ၊ ကူညီခြင်းဟာ မိမိကိုမမုန်းအောင် ၊ မိမိကို ချစ်ခင်လာအောင် လုပ်နည်း ပီယဆေးပါပဲ။

1. ဆင်းရဲနွမ်းပါးသူကို ပေးကမ်းခြင်း ဒါနနဲ့ကူညီခဲ့ပါတယ်။
2. ပစ္စည်ဥစ္စာပြည့်စုံသူများကိုတော့ ချစ်ခင်ဖွယ်ရာ ချိုသားသောစကား ပီယဝါစာနဲ့ ဆက်ဆံခဲ့ပါတယ်။
3. ဗဟုသုတနဲပါး သူများကိုတော့ ဆရာစား ချန်မထားပဲ ကြီးပွားရာ ကြီးပွားကြောင်း နည်းလမ်းကောင်း ပေးခြင်းဆိုတဲ့ အတ္ထစရိယာနဲ့ ကူညီခဲ့ပါတယ်။
4. တချို့လူများကိုတော့ တန်တူထား ဆက်ဆံပေါင်းသင်းခြင်းလို့ ဆိုတဲ့ သမာနတ္တတာနဲ့ ပေါင်းသင်း ဆက်ဆံခဲ့ပါတယ်။

ဤကဲ့သို့ သင်္ဂဟတရားလေးပါးနဲ့ လူအများကို အားပေး ကူညီ စောင့်ရှောက် ချီးမြှောက်ခဲ့တဲ့အတွက် လက်ချောင်း၊ခြေချောင်းလေးများဟာ နုညံ့ပျော့ပြောင်း၍ ညီညီညာညာဖြင့် အများနဲ့မတူ တမူထူးခြား နေခြင်းပဲဖြစ်ပါတယ်။

ဖြစ်လေရာဘဝတိုင်းမှာ သား၊သမီး တပည့်အခြံအရံတွေနဲ့ပြည့်စုံဖို့၊ လက်ချောင်း၊ ခြေချောင်းလေးများ နုညံပျော့ပြောင်း ညီညီညာညာ လှလှပပဖြစ်စေဖို့ လောကလူသားများကို သင်္ဂဟတရား လေးပါးဖြင့် ကူညီစောင့်ရှောက်ကြပါစို့..။